تحلية العلب

تحلية العلب
المقادير

علبة حليب مركز محلي (نيستلي) ، فنجال قهوة مركزة او نيسمافيه ، جينواز

مكسرات حسب الرغبة والامكانيات

موس اوشوكولا ، كرام شونتيي ، كورن فلس اي نوع

اول حاجة نطيبو جينواز بالطريقة العادية او اي نوع من المسكوتة

نخلوها تبرد ونفتوها



نفتحو علبة النيستلي وهي ماشي طايبة ونزيدوها النيسكافيه

نرحو المكسرات

نحضرو لي بوات تاعنا

نحطو فيهم شوي جينواز

نخلطو النيسكافيه بالحليب المركز والمكسرات كيما واضحين يكون كبار شوي

( استخدمت لوز وجوز وبيستاش وكثرت البيستاش بزااف)



نحطو المكسرات فوق لا جينواز

ونسقو كل بوات بمغرف كبيرة من خليط الحليب المركز


ومن بعد طبقة من لاموس اوشوكولا

ماصورتش خطواتها لكن نحطلكم الطريقة

3 كيسان ماء + 4 مغارف كبار سكر نخلوهم يغلو ويعقدو شوي

نذوبو فيهم 4 علب شوكولا نواغ

نحوهم من فوق النار يبردو شوي ونضيفو 10 صفار بيض

ونخلوهم على جنب

نخفقو 10 بياض مع رشة ملح ونطلعوهم مليح كي الثلج

ونزيدو البياض على الشوكولا ونحركو غير بلعقل ملفوق للتحت باش مايخسرش القوام

ونخلوها شوي في الثلاجة ساعتين على الاقل

وبعد مانحطوها نزيدو فوقها لاكرام شونتيي ونزينو بالكورنفلكس

ان شاء الله تكون عجبتكم الطريقة

التقي واياكم في وصفة جديدة باذن الله تعالى

لاتنسوني من صالح دعائكم