كسرة الشحمة بالطريقة التقليدية

السلام عليكم ورحمة الله تعالى وبركاته 

من مطبخي كسرة الشحمة بالطريقة التقليدية

المقادير 

للحشو 
بصلة كبيرة ثوم ، حبة طماطم كبيرة او زوج متوسطين، مغرف كبيرة طماطم مصبرة
2 حبات فلفل ، هريسة حسب الرغبة في لحرور ، وملح ،
شوي شحمة شايحة مملحة ، دبشة ، ونعناع يابس 

تحضير الحشو ( ماصورتوش )
نقطعو البصل الفلفل ونقلوهم في الشحمة مقطعة رقيقة وشوي زيت زيتون وملح وثوم
ونزيدو الطماطم مقطعة ولمصبرة ولهريسة نقصو عليهم النار ونخلوهم يطيبو 
وفي الاخير خلاص نزيدو الدبشة والنعناع ونغطوهم باش تدخل فيهم البنة 

نديرو عجينة الكسرة عادية كيما في الوصفة هذي برك مانديروش السانوج 


نحلو وحدة وتكون رقيقة 



نديرو عليها شوي حشو ونوزعوه مليح 



نحلو قرصة اخرى تاع كسرة وتكون اقل شوي من الاولى ونغطو بيها



نغلقوها مليح على لطراف باش ماتتحلش ونثقبوها بالفرشيطة 



ونحطوها طيب على طاجين الطين او طاجين لحديد 

 

حتى تتحمر على زوج جوايه 



وتتقطع وتتكل وهي سخونة 




وفي العادة ديما نديرو معاه سوب الخضار 






وصفة لا سوب ( حسب الخضار المتوفرة )
2 حبات بطاطا ، زوج طماطم ، بصلة كبيرة ، 4 حبات زرودية ،3 سنينات ثوم ،
ملح ، فلفل كحل وتوابل ، زيت زتون ، معدنوس ، وسدر دجاج
نقطعوهم كامل ( مربعات ) ونحطوهم يطبو في الماء حتى يبدا ينشف الماء
كي يطيبو نرحوهم بالميكسور ونزيدهم الماء الي طابو فيه حسب مابغيناها ثقيلة ولا خفيفة 
نصفوها وكي نقدموها نديرولها عصرة قارص وزيت زيتون 





ان شاء الله يكون الشرح واضح وعجبتكم الوصفة
دعوة خير اخواتي ماتنسونيش منها

ودي لكن