السبت، 3 ديسمبر، 2011

les Têtes de nègre



السلام عليكم
جبتلكم نوع قاطو يهبل اسمو les Têtes de nègre
مكانش الي ذاقو وماطلبش الوصفة تاعو
وشحال يرفع الراس قدام الضياف من بنتو
هو صح يتعب في الخدمة ويكره مي طعمتو تنسيك كل شيء
نبدالكم بالمقادير
على بركة الله
6 حبات بيض ، كاس حليب ، كاس عسل، كاس ناقص اصبعين زيت ، كاس ناقص اصبعين سكر
3 ملاعق كبار بودرة الكاكاوو المرة الي لونها اسود ، مغرف صغيرة بيكاربونات الصودا ، 2 خميرة كيميائية
وفرينة حوالي 20 مغرف كبيرة ، ورطل كاوكاو مرحي مقلي ، وكريمة الزبدة

التحضير
اولا البيض و رشة ملح نخلطوهم ونزديو عسل وسكر ونخلطو مليح مليح
حتى يذوب السكر
 
    


ومن بعد نزيدو الزيت ولحليب ونكملو الخلط
   
من بعد الكاكاوو والفرينة والخميرة والبيكاربونات

 

ونتحصلو على خليط قوامو خفيف كي المسكوتة

نفرغوه في بلاطو تاع كوشا كبير ويكون مدهون

نعدلوه ونسوو السطح تاعو

وندخلوه للكوشا يطيب
بعد مايطيب
يبرد شوي ونقطعوه دوائر زي اكا ولازم المول يكون مفتوح على جيهتين 
باش تسهال الحبة كي نخرجوها

هنا بعد ماقطعناهم كامل



 
والطراف والحواشي الي بقاو من بعد التقطيع نفتوهم بيدينا 
ونخلطوهم مع كاوكاو مرحي مقلي


نحتاجوهم للتزيين

نرجعو لحبات القاطو تاعنا
نقسمو كل حبة على زوج 
ونديرولها في الوسط شوي من كريمة الزبدة بهذي الطريقة
 
نغلقوها  
 
ونديرولها كريمة الزبدة على كل الحواشي

ونلفوها في خليط الكاوكاو والبقايا تاع القاطو
  

ويلزم تتغطي من كل الاطراف جيدا ونقدرو نضغطو عليها شوي بيدنا باش نعدلو شكلها   
وهاهم ليكم واجدين  
 
 
زوووم على الحشو من الداخل
 
والي عجبتها الوصفة ماتنسانيش من دعوة الخير

‏هناك 12 تعليقًا:

  1. ماشااء الله عليك حبيبتي كل شيئ رووعـــــة ربي يحفظك

    راجية الثواب

    ردحذف
    الردود
    1. اكثر من رائع

      حذف
  2. بارك الله فيك حبيبتى والله يعطك الصحة والله يعطك واش تتمنى

    ردحذف
  3. بارك الله فيك دايما مبدعة هذا اذا متب ربي نديرو في العيد

    ردحذف
    الردود
    1. وفيك بارك الله اختي
      شكرا على المتابعة وان شاء الله تكتبي اسمك في الرد باش نتعرف عليكي

      القاطو هذا ديريه على ضمانتي راهو يهبل ويعجب الناس كامل
      صدقيني ولا واحد ذاقو وماطلبش يزيد منو
      صح صحورك

      حذف
    2. شكرا اختي حابة نجربو بصح مفهمتش كيفاش نوجد كريمة الزبدة

      حذف
  4. بارك الله فيك اختي ربي يجازيك ممكن تمديلي وصفة كريمة الزبدة
    فائزة

    ردحذف
  5. يعطيك الصحة قاطو هائل وبنين وساهل

    ردحذف
  6. الله يعطيك الصحة حبيت نعرف طريقة صنع كريمة الزبدة
    mounia de tamanrasset

    ردحذف
  7. YA3TIK ASAHA

    ردحذف
  8. يعطيك الصحة حابة نعرف منك كريمة الزبدة

    ردحذف