السبت، 3 ديسمبر 2011

بقلاوة ملونة او لمخبل

 بقلاوة مخططة او لمخبل نفس التسمية 

فقط لمخبل يتقص مربعات اما البقلاوة معينات 

المقادير
4 كيلات فرينة ، كيلة دهان (3/4 سمن و1/4 زبدة لابال)، ماء الزهر ، والماء ، بودرة كاكاوو

التحضير

نديرو الفرينة والدهان 
نخلطوهم مليح ونحلوهم براحة اليد حتى تتبسس لعجينة 
ونلموها بماء الزهر وشوي ماء 
نقسموها 7 كريات ونغطوها نخلوها ترتاح 
للحشو

كيلو نوازات ، 500 غ لوز ، 500 غ جوز، سكرو ماء زهر


نحضرو الحشو تاعنا

نرحو كل المكسرات نخلطوهم مع بعض 
نزيدولهم كيلة سكر (3 كيلات مكسرات بكيلة سكر)
ونبلوهم بماء زهر 
نرجعو للعجينة

نحلو بالوحدة بالنشاء حتى تكون قيس لبلاطو تاعنا

نحطو الورقة الاولى وندهنوها بالسمن ونحطو فوقها الثانية ونزيدو
ندهنو ونكملو هكا حتى نديرو 4 طبقات من تحت 


نحطو الحشوة تاعنا 

ونغطو بزوج طبقات اوخرين وماننسوش الدهان بيناتهم

اما الطبقة اللخرة نقسموها على زوج

نص نخلوه ابيض والنص لوخر نديرو فيه بودرو الكاكاوو ونعجنوها مليح حتى تكون لون واحد

وبلاماشين تاع بقلاوة نحلوها ونديرو شرائط من اللونين

وفي وسط البلاطو نحطو شريط بني وبعدو ابيض وهكا واحد في جنب واحد ومايكونوش متباعدين
حتى نكملوها 
ندهنوها للمرة الاخيرة ونقطعوها مربعات 
ونرشقوها بحبات نوزات وندخلوها للفرن
ومع طيب وكي نخرجوها بعد وهي سخونة نشربوها بلعسل فيه شوي ماء زهر 

وهذا شكلها المعين التقليدي 

ان شاء الله تعجبكم

هناك 6 تعليقات:

  1. من عند نوال شكل جديد بارك الله فيكي موووووووووووون

    ردحذف
    الردود
    1. اهلا وسهلا اختي نوال وفيك بارك الله
      نورتي المدونة

      حذف
    2. ما شااااااااااااء الله عليك يا مون والله وصفاتك رائعة رائعة راني جربت منها ونالت الاستحسان الكبير لا حرمناك يا رب واش نقولك فحلة ونص شاطرة ربي يبارك ربي يحفظك يا غالية

      حذف
    3. مرحبا اختي صبرينة نورتي
      تطبيقك يسرني والحمدو لله انها كانت ناجحة معاكي
      امين يارب وولك المثل ان شاااء الله
      رانا في الطريق التعلم برك مزال ماوصلت فحلة صح ههه

      حذف
  2. اختي الله يبارك بقلاوتك راااااااااائعة حابة نجربها في اقرب وقت

    من فضلك عندي سؤال بخصوص الكاكاوو كي نعملو بيه الشرائط

    ميتبدلش ذوقهم بطعم الكاكاوو او مش مؤثر

    و شكرا لك مسبقا ربي يحفظك

    الواثقة بالله

    ردحذف
    الردود
    1. وفيك بارك الله اختي
      وتواجد ومتابعتك المستمرة للمدونة يسرني :)

      الطعم مايتبدلش ومايبانش خلاص خاطر راح تكون معسلة

      حذف